قصائد للشاعرعبد الرحمن الابنودي

قصيدة

(( البدل))

أبادْلكُم حرّية .. بسجن.
أبادلكم سِلْم .. بحرب.
أبادلكم صوتى .. بصمت.
أبادلكم اسمى .. بصوت مجهول.
أبادلكم فدادين الطين
بالعتمة فى رطوبة الزنازين.
أبادلكم حاكم عادل بالفرعون الجبار.
الجنّة .. بالنار.
الراحة .. بتعب القلب.
أبادلكم أمن .. بخوف.
زُهرّية ورْد .. بكباية دم.
وحياة مرتاحة أبادلها بموت.
أبادلكم ضِحكاتى .. بغمّ
ورفيقى أبادله بمخبر كلب.
أبادلكم لو كنتوا تبادلونى
تاخدوا سنواتكم وتردُّولى السنوات.
صعب تردُّولى السنوات !!.
صعب تبادلونى برجوع العزة
ومعنى الوطنية والأوطان ..
للشعب.
ورجوع دمّ الشهداء.
والوجه الأصلى لكلمة أعداء.
ونضارة وجْه الفقراء.
وكرامة تساوى كرامة كلّ اللى اتسلبوا.
والنصر .. لكل اللى من غير حرب
اتغلبوا !!
بادْلونى .. وجوه بوجوه
ولغات بلغات.
خدوا كل اللى حيلتنا من ألوفات:
اللى اتنهبوا .. واللى لسه حيتنهبوا
وردوا للأمة رجولتها ونخوتها وقُدرتها.
ردُّوها من تابع مذلول
لزعيمة لاستقلال.
من قُطعان سايحة .. لرجال.
ردولها كل اللى سرقتوه من مال.
ادفعوا عنْها ديون الأطفال.
ردوا لها شمس المستقبل
واكنسوا أطنان العتمة من درب الأجيال.
أخلاق الشعب اللى انداس ..
واللى أصبح ناس مش ناس !!
ردوا للشعب رغيفُه المخطوف.
صوته الأصلى وعرقه المسفُوف.
وبالمجّانى .. رجعوا للطفل الكراس.
ابنوا على شط النيل المصنع جنب المصنع.
رُدوا للجندى المصرى وظيفة المدفع.
ردُّوا الإنسان العادى ياخُدْ قيمةْ ما يدفع.
والفلاح ردوه من ذُل الغربة
وردوله حُبه للفاس.
رُدوا الوطن المسروق
اللى اتمرغ فى مخالب السوق.
فكوا عنه الطوق.
شِلُّوا القدم الصهيونية الساكنة فى الدقى
وماشية فى باب اللوق.
ردُّوا الجمعية للفلاحين
والمصنع للعمال.
لو تقدروا تخرجوا مِ الأغلال
اللى كتفكم بيها اللى علمكم لعبة رأس المال ..
لو غيرتوا الحال ..
أُقسم قدام شعبى أغنى لكم من قلبى
وعمرى ما غنى تانى
لـ .. (جمال) !!

قصيدة

يـامنـــه !!

والله وشبت ياعبد الرحمن
عجزت ياواد ؟
مسرع ؟
ميتى وكيف ؟
عاد اللى يعجز
فى بلاده
غير اللى يعجز ضيف
هلكوك النسوان ؟
شفتك مره فى التلفزيون
ومره ورونى صورتك
فى الجورنان
قلت كبر عبد الرحمن !!
امال انا على كده مت
بقى لى ميت حول !!
والله خايفه ياولدى القعده تطول
مات الشيخ محمود
وماتت فاطنه اب قنديل
واتباع كرم اب غبان
وانا لسه حيه
وباين حاحيا كمان وكمان
عشت كتير
عشت لحد ماشفتك عجزت
ياعبد الرحمن
وقالولى قال خلفت
وانت عجوز خلفت ياخوى
وبنات ؟
امال كنت بتعمل ايه
طيلة العمر الفات ؟
دلوقت مافقت ؟
وجايبهم دلوك تعمل بيهم ايه ؟
على كل
اهى ريحه من ريحتك
ع الارض
يونسوا بعض
ماشى ياعبد الرحمن
اهو عشنا وطلنا منك
بصه وشمه
دلوك بس مافكرت فى يامنه
وقلت ياعمه
حبيبى انت ياعبد الرحمن
والله حبيبى وتتحب
على قد ماسارقاك الغربه
لكن ليك قلب
مش زى اولاد الكلب
اللى نسيونا زمان
حلوه مرتك وعيولاتك
والا شبهنا
سميتهم ايه
قالوا ايه ونور
ماعارفش تجبلك حتة واد
والا اقولك
يعنى اللى جبناهم
نفعونا فى الدنيا بايه
غيرشى الانسان مغرور
ولسه يامنه
حاتعيش وحاتلبس
لما جايبلى قطيفه وكستور
كنت اديتهمنى فلوس
اشترى للركبه دهان
ابا...ى
يامجلع قوى ياعبد الرحمن
طب دانا ليا ست سنين
مزروعه فى ضهر الباب
لم طلوا عليا احبا
ولا الاغراب
خليهم ينفعوا
اعملهم اكفان !!
كرمش وشى
فاكر يامنه
وفاكر الوش
اوعه تصدقها الدنيا
غش فى غش
اذا جاك الموت ياوليدى
موت على طول
اللى اتخطفوا
فضلوا احباب
صاحيين فى القلب
كان ماحدش غاب
واللى ماتوا
حته حته
ونشفوا حيين
حتى سلامو عليكو
مش بتعدى
من بره الاعتاب
اول مايجيك الموت
افتح
اول ماينادى عليك اجلح
انت الكسبان
اوعى تحسبه حساب
ولا واد ولا بت
ده زمن يوم مايصدق
كداب
سيبهاله بالحال والمال
وانفد
اوعى تبص وراك
الورث تراب
وحيطان الايام طين
وعيالك بيك
مش بيك عايشين
يوه .... يارمان
مشوار طولان
واللى يطوله عن يومه
ياحبيبى حمار
الدوا عاوزاه
لوجيعة الركبه
مش لطوالة العمر
اوعه تصدق الوانه
صفر وحمر
مش كنت جميله ياواد
مش كنت وكنت
وجدعه تخاف منى الرجال
لكن فين شفتونى
كنتوا عيال
بناتى ( رضيه ) "ونجيه "
وماتوا وراحوا
وانا اللى قعدت
طيب يازمان
اوعه تعيش يوم واحد
بعد عيالك
اوعى ياعبد الرحمن
فى الدنيا
وجع وهموم
اشكال والوان
الناس مابتعرفهاش
اوعرهم
لو حاتعيش بعد عيالك
ماتموت
ساعتها بس
حاتعرف
ايه هوه الموت
اول مايجيلك نط
لسة بتحكيلهم بحرى
حكاية فاطنه
وحراجى القط
اباى ماكنت شقى وعفريت
من دون
كل الولدات
كنت مخاوى براوى
وكنت مخبى فى عنيك السحراوى
تملى حاجات
زى الحدايه
تخوى ع الحاجه وتطير
من صغرك
بضوافرواعره
ومناقير
بس ماكنتش كداب
وادينى استنيت فى الدنيا
لما شعرك شاب
قدم البيت
اتهدت قبله بيوت
واصيل هوه
مستنينى لما انوت
حتيجى العيد الجاى
وحتشرب
مع يامنه الشاى
***
حاجىياعمه وجيت
لالقيت يامنه
ولا البيت
***

قصيدة

يامنة

[color=magenta][color=magenta][color:e857=magenta:e857]والله وشبت يا عبد الرّحمان
عجّزت ياواد ؟
مسرع..؟
ميتى وكيف ؟
عاد اللي يعجّز
في بلاده
غير اللي يعجّز ضيف.
هلكوك النسوان؟
شفتك مره فى التليفزيون ومرّه ورّوني صـــــــــــــــورتك في الجورنان
قلت:كبر عبد الرحمان !!
أمّال أنا على كده مت
بقى لى ميت حول.!!
والله خايفة يا ولدي القعدة تطول .
مات الشيخ محمود
وماتت فاطنة أب قنديل.. واتبـــاع
كرم أب غبّان!!
وأنا لسّه حيّة وباين حاحيّا كمان
وكمان ..!!
عشت كتير
عشت لحد ما شفتك عجّزت يا عبد
الرحمان .
وقالوا لي قال: خلّفتوانت عجوز خلّفت ياخــــوي؟
وبنات؟
أمّال كنت بتعمل ايه طيلة العمر
اللي فات ؟
دلوقت ما فقت؟
وجايبهم دلوك تعمل بيهم ايه ؟
على كل أهي ريحة من ريحتك ع
الارض
يونسوا بعض
ماشي يا عبد الرحمان!!
أهو عشنا وطلنا منّك بصّة وشمّة
دلوك بس مافكرت في " يامنة"
وقلت: يا عمة؟!
حبيبي انت يا عبد الرحمان..
والله حبيبى وتتحب
على قد ماسارقاك الغربة
لكن ليك قلب
مش زي ولاد الكلب اللي نسيونا
زمان.
حلوة مرتك وعويلاتك ؟
والاّ شبهنا..؟
سمّيتهم ايه؟ قالوا لى"" أية ونور"
ماعارفش تجيب لك حتة واد ؟
والاّ أقولك :
يعني اللي جبناهم
نفعونا في الدنيا بإيه..؟
غيرش الإنسان مغرور..!!
ولسّه يامنة حاتعيش وحتلبس
لمّا جايب لي قطيفة وكستور؟ كنت اديتهمنى فلوس
اشترى للركبه دهان
أبااااى ما مجلّع قوى يا عبد
الرحمان.
طب ده أنا ليّا ست سنين
مزروعة ف ضهر الباب
لا طلّوا عليّا أحبّة ولا اغراب
خليهم.
ينفعوا .
أعملهم أكفان..!!
كرمش وشّى ..
فاكر " يامنة" وفاكر الوش؟
أوعى تصدّقها الدنيا
غش ف غش.!!
إذا جاك الموت يا وليدي موت على
طول
اللي اتخطفوا فضلوا أحباب
صاحيين في القلب كأن ما حدش
غاب
واللي ماتوا حتة حتة
ونشفوا حيين
حتى سلامو عليكم مش بتعدي
من بره الأعتاب.
أول ما يجيك الموت افتح
أول ما ينادى عليك اجلح
انت الكسبان
أوعى تحسبها حساب..!!
ولا واد ولا بت
ده زمن يوم ما يصدق.. كداب.
سيبهالهم بالحال والمال وانفد.
أوعى تبص وراك..
الورث تراب
وحيطان الأيام.. طين
وعيالك بيك موش بيك عايشين.!!يوووووه يا" زمان"
مشوار طولان
واللي يطول عن يومه يا حبيبي
حمار.
الدوا عاوزاه لوجيعة الركبة
مش لطولة العمر
أوعى تصدق ألوانها صفر وحمر
موش كنت جميلة يا واد ؟
مش كنت وكنت؟
وجدعة تخاف مني الرجال؟
لكن فين شفتوني؟ كنتوا عيال
بناتي (رضيّة) و" نجيّة"
وماتوا وراحوا وانا اللي قعدت
طيّب يازمان
أوعى تعيش يوم واحد بعد عيالك
أوعى يا عبد الرحمان
في الدنيا وجع وهموم أشكال والوان
الناس ما بتعرفهاش
أوعرهم لو حتعيش بعد عيالك ما
تموت.!!
ساعتها بس .. هتعرف ايـــــــه هو
الموت!!
أول مايجي لك نطّ
لسه بتحكي لهم بحري
حكاية فاطنة وحراجي القط؟أباي ما كنت شقي وعفريت
من دون كل الولدات.
كنت مخالف.. برّاوي
وكنت مخبي في عينيك السحراوي
تمللي حاجات
زى الحدّاية تخوّي ع الحاجة
وتطير
من صغرك بضوافر واعــــــــرة
ومناقير
بس ما كنتش كداب.
واديني استنيت في الدني
لما شعرك شاب
قدم البيت
اتهدّت قبله بيوت وبيوت
وأصيل هوّه... مستنينى لما أمت
حتيجي العيد الجاي؟
واذا جيت حتجينى لجاى ؟
وحتشرب مع يامنّة الشاي؟
*******
حاجي ياعمّة... وجيت
لا لقيت يامنة ولا البيت ..!!

[color:e857=magenta:e857]

1997

قصيدة سيد طه

[color=magenta]زي المسمار القلاووظ
قصير .. وتحس أنه قصيٌر أكتر
لما يقوم
أسمر..وكأنه قديم
الدم صعيدي ما زال
الوش الحامي والقول
صادق ..م القلب
وعمره ما كان كذاب
أو معمول
إذا حط ايديه في مشروع
لا بد يبوظ
صراحته بتفسد أيها موضوع
لكن الصدق
ما بيتبعش بمال
ما دام الدم صعيدي ما زال
ولا بيعرفش الا الصدق
حتي لو هو وولاده
يموتوا من الجوع
حاحكي لك قصة صاصا يا أستاذ
كان صاصا ده قول فرعة وزارعها شيطان
كان أكره شئ عنده هم البريطان
وسياسي صح
بقعد حنب الراديو في ميعاد النشرة
ومعين واحد عنده لقراية الجرنان
مش يعني معينه بمرتب
ليه.. ما تقوله .. معينة بالضرب
لكن كانو بيحبوه والا لاء ؟... ويحموه ولا لاء
بس يا استاذ
كان فيه خبصية والا مفيش

الإنجليز في البر التاني أخدو علم
وصادوهم بفكارزاتهم.. والرشاشين
خراطيش خراطيش
واللهي الميه بين الشطين يومها غلت من سهج النار
قلنا ضاعوا الولدات
وام علي اب سلمي تصرخ وتقول يا ولادي
طلع الشط يوميها بناسه وعياله
من جبلاية السيد هاشم والفار واب عارف
واللي جه من الشلوفة والكمامنتو
صوت الضرب الجامد صحي الناس من النوم
قول وطلعنا النسوان تصرخ
والرجالة بتدعي والعيايل بتقول
يخرب بيتك يا خواجة
يخرب بيتك يا خواجة
مات حد يا سيد طه
ولا حد
واحد بس اتعور كان اسمه غريب
الناس قالت سيدك الغريب ..نجٌاهم فيه
جابهم همٌ سلامه وخد الطلقة في دراعه
طلعوا يا أستاذ من المية
وكنالنا دي في الشتا أسقع م الثلج
ولعنا الفرن
ودفيناهم
حبٌة طلعوا فوق
والباقي كان لافف من حوالين الفرن ف وش النار
وفاكرهم
وكأن ده لسة بيحصل دلوقت تمام

[color:6869=magenta:6869]كان بيتنا ورا بيت عم " اب سلمى
وكانت أمي لسة عايشة
برضة بالنسبة لدلوقتي يا " على اب سلمى"
كنا عيال
إي......ه"
وآديكي برضه رجعتي من تاني للشقا ... يا كنال
للنار ... وخراب البيت والهجرة
برضه رجع لك تاني الكاكي
ده أنت غريبة بشكل .... غريبة يا كنال
بتحبينا احنا أكتر
والا بتحبي العسك أكتر؟
والا بتشتاقيلنا احنا لاتنين ؟
بتضايفي دول نوبة
وتضايفي دول نوبة
إحنا في أيام الزرع
وهمٌ في أيام الحرب
عمري ياخي ما شفت "كنان"
بيحب الدان ذي ما بيحب الرمان
الا انتي يا "كنان"
" إحكي لنا يا حاج اب سلمى حكاية كوبري بور توفيق .."
" ليه .. هو لسة فاضل حد ما يعرفهاش؟ "

__________________

البت جمالات

بياع الوشنة
اللي العصرية بيزمر ويفوت
م اليوم مش هيفوت
ولا هينادي علي المنجة والتوت
زي ما كل الناس بتموت
بياع الوشنة يا جمالات مات
عدي الموسم
وشجرة النبق اتخضت
والتكعيبة عرف سكٌتها الموت
التعابين كترت في الهيش
كيف بس يا خالي تقول حاجي
ولا تجيش؟
طب مش تيجي تسأل عل جمالات
لسة بتعيش؟
لسة عايشة يا جمالات؟!
عايشة وزي العفاريت
والديناميت..؟!
الديناميت والنار دايرين
وانا في الفدان ماسكة المنجل
وبجيب للفرسة حشيش
الكلب الٌلسود؟
الكلب الٌلسود تعيش انت
وديكة خدته الدانة
مش ناوي يا خال تقعد لك جمعة معانا
خواف

أمه..
خالي عبد الرحمن خواف
بقي زي الافنديات اللي من مصر
إستني اما اروي لك حاجة تفطس م الضحك
مش مرة كان الضرب شديد
الإسرائلين بعتوا صواريخ
الواحد كد الزير
الواحد منهم ييجي حايم كدة
وكأنه جاي في البي
جدتي إيه ..؟ شافت في الجو صاروخ
وتقول جاي مخصوص
ما قدرناش لا نفر ورا الشجرة
ولا نرقد في البوص
جدتي دي رقدت على ضهرها
وترفصله برجليها

إبعد يا فطيس
إبعد يا نجس يابن الملاعين
واحنا هنموت من الخوف والضحك
إتفجر ورا بيت عيد
صح ده كان يوم ربنا ما يوريك
والا الديك
اتفرفت في الديناميت فرفيت
جدي براهيم يومها
لما لاقيني بكيت
قاللي وهوه بيضحك
أوه ..بكرة يا جمالات
الأرض هتطرح مليون ديك
وحيغني خالك عبد الرحمن
دي الدانة فرشته ع الفدان
إيه قاعد تتلفت حواليك ليه
خايف م الدانة ؟
خواف

أمه خالي عبد الرحمن خواف
وأنا أقوله قال
اقعدلك جمعة معانا
سيبك من الديك دلوقت يا جمالات
خلينا في حكاية الكلب الٌلسود
ماله
من بين بهايمنا وطيرنا
هو اللي انصاب
انصاب نوبتين
المرة الأولانية خد شظو ف رجليه
والمرة التانية صاروخ
كأنه ركبله أجنحة زي الطير
اتبعزق زي التبن ما يخده الريح
من ع المدرة
هوه كان كلب ولا كلبه يا جمالات
كلبه أصيلة واصله ما يخفش ع السامعين
إن كلاب الدنيا
دي زي البني آدمين
فيها الزين والشين
فيها المجرم والمسكين
اللي أصيل واللي عويل
واللي خاين واللي أمين
إنما دي كانت كلبة مش كلب
كلبة إنما واللهي يا خالي
تقول لها قلب
نتاية يا خالي بس أصيلة صح
ونبيهة صح
وهوه دلوقت كلابنا يا خالي
بقي فيها كلاب..؟