قصيده جديده للشاعره إيمان بكري بعنوان بحبك ياحمار

بعنوان بحبك ياحمار

بيقولوا فيه مطرب مكار
بيغني بحبك يا حمار
الواد ده وصولي وكداب
ومنافق وكمان معار
وأشمعني لوحده اللي يحبك
كلنااااااااااا بنحبك يا حمار
ده لأنك فعلا متفاهم
ومبرطع فينا ومش فاهم
وبتبعد عن أي تفاهم
بعزيمه غبيه وأصرار
فيه عشره مابينا مبتهنشي
وان هانت برضه منقدرشي
محكمه العدل متحكمشي
وان حكمت حتولع نار
مثلتوا علينا الثلاثيه
في بطوله وكانت جمعيه
وعشان ماهتكمل سداسيه
عملتوا ألف حصار وحصار
وفوسط ميدان الحريه
في شعله ماسكاها وليه
ماتكونش دي ليزا المخفيه
مديه إشاره أنذار
وعلي العموم أنا حبيتك
وإلهي يا بعيد يخرب بيتك
لو يوم حتشك في أخلاصي
وتصدق نم الأشرار
هو سؤال ومفهش هزار
هو أنت يعني حمار ياحمار
علشان تصدق أن الفار
ممكن يقول لأسد يا حمار
وبعاهدك والعهد أمانه
حتنك علطول ويانا
حموريه أهلك عجبانا
ياواخدنا من الدار للنار
كل الحمره من عملك جيم
وأتفقوا أنك بغل عظيم
فهيوزعوا شربات برسيم
عالعربخانه وعالزوار
أرجوك يا حمار بس أفهمني
أنا مش حامار هتخاف مني
أنا برضه حمار وأحمر منك
متنهق قول أي حوار
بنقولك شي مبتمشيشي
والحا بنقولها مبتجيشي
ونقولك هس مبتهسش
ومكمل بينا المشوار
وعشان كده طبعا حبينك
كلناااااااااا بنحبك ياحمار

يمكن تنزيا القصيده مصوره بصوت الشاعره إيمان بكري من الرابط التالي
https://www.youtube.com/watch?v=rCAOYvImzg8